Gabriel Aresti euskaltegia » Azala

Kafe Antzokiaren tailerrak urte berrian ere

komunikazioa — Sat, 24 Dec 2011 10:33:21 +0000

Aurreko hiruhilekoa arrakasta handiz burutu ostean, berriro dugu aukera Zenbat Garak Kafe Antzokian antolatzen dituen tailerretako batean izena emateko. Urtarrilaren 26an hasiko dira bigarren hiruhileko tailerrak. Hori bai, Gabriel Aresti euskaltegiko ikasleek doan daukate tailerretan parte hartzeko aukera. Izena emateko eta informazio gehiagorako, Zenbat Gara Elkartearen bulegora jo (Kafe Antzoki gainean, 4. solairuan) edo telefonoz 94 423 75 91 zenbakira deitu.

Hiru hilabeteko iraupena izaten dute tailer bakoitzak eta, bat bukatu ostean, beste bat aukera daiteke hurrengoan, dagoen aukera zabalaren artean. Ezaugarri desberdinetako tailerrak dira, ikuspegi kulturala lantzekoetatik hasi eta ludiko hutsetarainokoak. Besteak beste, kantagintza, euskal dantzak, haur kanta eta jolasak, bertsolaritza, euskararen soziolinguistika, irratia, bideogintza… eta beste asko, eskaeren arabera, sortuz joango direnak.

Tailerra, gure hizkuntzaren senetik ulertuta, elkarrekin zerbait egiten den jarduna da. Formakuntza zein ludikotasuna lantzeko bitarteko eta tresna; tailerra giza taldeak osatzen du gidari baten laguntzaz, eta bakoitzak dauzkagun gustuak lantzeko esparrua irekitzen digu. Gure Bilbo honetan milaka asko gara euskararen komunitatea osatzen dugunok eta gure aisialdia, lagun artekoa, prestakuntza, garapena, bizimodua azken finean, euskaraz egiten dugunok. Egoera horri erantzutera dator Kafe Antzokiak antolatutako tailerren ekimena.

Kontzertuak, prentsaurrekoak, kultur ekimenak, kantagintza, dantza ganbara, bertso ekitaldiak, bazkari-afariak, elkartasunezko jaiak… Eta horiez guztiez gain, Kafe Antzokiak orain tailerrak antolatu ditu bilbotar guztiontzat. Euskara ikasle, euskaldun zahar… etor zaitez lagun artera eta goza ezazu euskaraz, zeure gustuko jardunetan parte hartuz!

Bertsolari filma ikusgai ikasleontzat

Euskaltegia — Fri, 25 Nov 2011 18:20:05 +0000

Bilboko Alondegian Asier Altunak zuzendutako Bertsolari filma ikusteko aukera izango dugu Bilboko euskara ikasleok azaroaren 29an. Horretarako, besteak beste, Miren Amuriza, Maialen Lujanbio, Jon Maia eta Andoñi Egaña bertsolari paregabeak izan ditu lagun zinema zuzendariak. Egun osoan zehar bost emanaldi eskainiko ditu alondegiko Golem zinema aretoak. Lehenengoa 8:30ean, bigarrena 10:30ean eta hirugarrena 14:00etan izango da. Arratsaldez, berriz, 16:30ean lehenengoa eta 18:30ean azkena. Sarrera 3,50 euroan eskuragarri egongo da Bilboko euskara ikasle ororentzat. Goiko irudiak klik eginda, filmaren trailerra ikus daiteke. Informazio gehiago BERRIA egunkarian.

2011-2012 ikasturtea hasi da

Euskaltegia — Fri, 02 Sep 2011 13:36:56 +0000

Zabalik dago 2011-2012 ikasturterako matrikulazioa, denon ordutegi eta egutegietara moldatzeko eskaintza zabalarekin. Ikasturtea urriaren 3an hasi da eta iazko prezioak mantenduko dira. Ikastaro guztiak HABEk homologatuak dira eta ikasleentzako, HABEk ematen dituen diru-laguntzez gain, Bilboko Udalak gurasoei euskara ikasteko diru-laguntzak ematen dizkie (hainbat udalek matrikularen kostu osoa diruz laguntzen dute, gaindituz gero). Matrikula zabalik dago, ordutegi eta prezio guztiak dituen PDFa jaitsi dezakezu HEMENDIK.

Egunero bi ordukokurtsoetan, esaterako, ordutegi berriak gehitu ditugu: 14:00-16:00 13:00-15:00 15:00-17:00 eta 17:00-19:00, lehendik zegoen aukera osatuz.Goizeko lehenengo ordua edo eguerdia profitatu nahi dutenentzat, berriz, 7:00-8:30 aukera berria gehitu dugu egunero ordu eta erdiko eskoletan, orain arte zeuden 7:30-9:00 14:00-15:30 aukerez gain.

Ordutegi arazoak ez baina egutegian egun batzuk libre izatea nahiago dutenentzat astean hiru eguneko aukera daukagu, astelehen, asteazken eta ostegunetan klaseak 10:00-12:00 edo 18:00-20:00 ordutegietan. Aurten astean lau eguneko aukera ere sartuko dugu, 15:00-17:30 tartean egunero 2,5 ordu eginez eta ostiralak libratuz. Gazteentzako ikastaroak (16-20 urtekoentzat) egongo dira, bi orduz (18:00-20:00) astean hiru egunetan (astelehen, asteazken eta osteguna).

Euskara ikasten ordu gehiago eman nahi dituztenek egunero hiru, lau edo bost orduko ikastaro trinkoak egiteko aukera izango dute, ordutegi aukera zabalarekin. Aurreko urteetan bezala, larunbat goizetan ere klaseak izango dira (8:30-14:00), hizkuntza eskakizunak prestatzen ari direnei zuzenduak, baita larunbata ostiraleko bi ordurekin konbinatzeko aukera ere. Ordenagailu bidezko autoikaskuntza aukerak izango ditugu eta EGAtik gorako 4. maila ere bai.

Bestelako ikastaroak ere antolatuko dira (Mintzamena – Bizkaiera – Sakontzen, astebeteko eta asteburuetako ikastaroak, yoga, aerobic, euskal dantza, masaje…) eta euskara lantegien eskaintza zabala izango dugu, jarduera bat ikasi bitartean euskaraz egin nahi dutenentzat.

Neguan ere barnetegiak (astebete eta asteburuko egonaldiak) eta txangoak antolatuko ditugu, Kafe Antzokian izan ohi dugun hitzaldi, aurkezpen, festa eta kultura hitzorduen aukera ahaztu barik.