Gabriel Aresti euskaltegia

Bilboko zubiak

komunikazioa — Fri, 03 Feb 2012 07:53:12 +0000

Bilboko portuak oso garrantzitsuak ziren haien segurtasunagatik. Alde batetik, ezin ziren itsaslapurrak sartu, eta bestetik, itsasoa haserre zegoenean ezinezkoa zen barneratu. Bilbo gero eta handiagoa zenez, zubi gehiago eraiki behar izan zituzten eta horregatik portua poliki-poliki kanporantz zabaldu zuten.

Hala ere, zer oztopatzen zuten zubiek?

Testua: Sorne, Ali eta Lourdes (7.urratsa)

Argazkia: Sorne (7.urratsa)

Aznar eraikina

komunikazioa — Fri, 03 Feb 2012 07:50:59 +0000

XIX. mendearen bukaeran hemengo itsasontziak egurrezkoak ziren eta garrantzi handia zeukaten mundu osoan. Iraultza industrialaren ondorioz, itsasontziak zaharkituak geratu ziren. Ibarra, Bilboko familia aberatsa zen eta Ingalaterrara joan ziren nola egiten zuten itsasontzi berriak ikustera. Ideia berriak ekarri zituzten eta Boluetan egiten hasi ziren lehenengo baporezko itsasontziak. Arrakasta handia izan zutenez, ontzi-enpresa asko sortu zituzten, itsasadarraren inguruan. Ba al dakizue argazkian agertzen den Aznar Eraikin horrek itsasontzi itxura duen?

Testua: Sorne, Ali eta Lourdes (7.urratsa)

Argazkia: Sorne (7.urratsa)

Sabino Arana (1865-1903)

komunikazioa — Wed, 01 Feb 2012 09:21:48 +0000

1865eko urtarrilaren 26an Abandon jaio zen. Euskal politikari, ideologo abertzale, jeltzale, idazle eta euskalari izan zen. 1903ko azaroaren 25ean hil zen. Aranak Bizkaiaren independentzia eskatzen zuen. Bera bakarrik ikasi zuen euskara eta euskararen hitz landuak asmatu zituen. 1896an Aranatar anaiek sortu zuten lehen ikurriña. Bizkaia independentziarentzat pentsatuta zegoen, azkenean Euskal Herriko bandera bilakatu zen. Baina ba al dakizue zer esan nahi duten ikurriñaren koloreek eta formek?

Testua: Jennifer eta Zuriñe (7.urratsa)

Argazkia: Sorne (7.urratsa)

San Blas opil lehiaketa

komunikazioa — Tue, 31 Jan 2012 21:05:00 +0000

Otsailean sartu gara, eta horrekin batera bi data garrantzitsu heltzen zaizkigu euskaldunoi: San Blas, otsailaren 3an, eta Santa Ageda, otsailaren 5ean, protagonismoa bezperak hartu ohi badu ere. Santu hauen inguruan, hainbat herrik ospatzen dituzte azokak eta jaiak, eta Gabriel Aresti euskaltegiak ere prestatu du berea aste honen bukaerarako. Ostiral honetan, egun osoan zehar, Euskal Herriko herri ugaritan prestatzen dituzten opil tipikoen lehiaketa ospatuz egingo diogu San Blasi gorazarre. Ondoren, gaixotasunen aurrean babesa eskatzeko unea dela aprobetxatuz eta Ageda Deuna egunaren bezpera larunbatean delarik, betiko koplak entseatuko ditugu makila eskuan.

San Blas opilen lehiaketan parte hartu nahi duzula eta ez dakizula nola prestatu? Hona hemen errezeta:

OSAGAIAK:
-Kilo bat irin
-6 arrautza (bi zuringo gorde)
-200 gr gurin (garai batean txerri-gantza)
-500 gr azukre
-4 sobre legamia
-Anis-esentzia

PROZEDURA:
Irina, azukrea eta legamia nahastuta mahai gainean jarri sumenditxo eran. Erdian arrautzak bota eta eskuez ondo oretu. Gurina gehitzen joan (gurina ez da hotz egon behar, bestela izugarri kostatuko zaigu oretzea) eta anisa ere gehitu.
Opilak egiteko aluminiozko paperari gurina eman eta ore zati bat zapaldu zentimetroko lodiera lortu arte.
Labea 200ºtan berotu eta opilak sartu 10 minutuz.
Labetik atera eta hoztu denean gaineko geruza zuria ipini behar zaio.

Geruza zuria egiteko osagaiak:

-Gorde ditugun 2 zuringoak
-350 gr azukre-hauts

Osagai biak nahastu maribainutan sardeskaz edo irabiagailuz.

Anima zaitez eta on egin!

Antonio Trueba (1819-1889)

komunikazioa — Tue, 31 Jan 2012 08:28:45 +0000

1819an jaio zen Montellanón (Galdames), gerra hasi eta Madrilera joan zen, Madrilen liburuak idatzi zituen. Bilbora itzuli zenean, Bizkaiko kronikak idatzi zituen. 1889an hil zen Bilbon, eta maitagarria zenez, eskultura bat egin zioten jendearen diruarekin. Badakizue zergatik agertzen den eserita Trueba?

Testua: Jennifer eta Zuriñe

Argazkia: Sorne

Abando auzoa

komunikazioa — Tue, 31 Jan 2012 07:54:37 +0000

Gabriel Aresti euskaltegiak hilero programatuko dituen ibilbidei buruzko informazioaren berri eman nahi dizue hurrengo 6 argazkien bidez. Lehenengo txangoa “Abando ezagutu I” izan zen. Eta otsailean, berriz, “Abando ezagutu II” eta “Burdinaren bidea” burutuko dira Iñaki Larrañaga eta Xabier Monasterioren eskutik. Bilbo Hiria ezagutzeko aukera paregabea izango duzue hemendik aurrera.

Orain dela 700 urte, Bilbo eta Abando leku desberdinak ziren. Abandon familia gutxi bizi ziren; hala ere, leku egokiena eta zabalena zen lurra lantzeko, horregatik, garia eta artoa lantzen zuten. Bilbo Abando baino aberatsagoa zen, portu nagusia zuelako eta hainbat zerga kobratzen zituelako. Hori dela eta, haien artean gatazka handiak zeuden. Nola bukatu zuten gatazka hauekin?

Testua: Judit eta Christian (7.urratsa)

Argazkia: Sorne (7.urratsa)

Abandoko lagunak urtarrilaren 21ean

komunikazioa — Sat, 14 Jan 2012 12:07:30 +0000

Hauxek dira Abandoko Lagunak taldeak auzoan antolatu dituen ekitaldiak datorren urtarrilaren 21erako:

12:00etan Txango kulturala “Abandoko historia ezagutuz” Done Bikendi plazatik abiatuta

13:30ean Bertso-triki kalejira Ledesman Roberto eta Kepa + eskolako trikitilariak + bertsolariak

14:30ean Bertso-bazkaria: Onintza Enbeita eta Alaia Martin (Kafe Antzokian: Sarrera 20 € ).

Urte berria, web berria eta kurtso berriak

Euskaltegia — Sun, 01 Jan 2012 07:14:27 +0000

2012. urte berrirako zure asmoen artean euskaltegian kurtso berriren bat egitea badago, zorioneko zaude, kurtsoen eta ordutegien aukera zabala izango baituzu eskura Gabriel Aresti euskaltegian. Hiruhilabete berriarekin hainbat kurtso eta tailer hasiko dira eta zure maila eta ordutegien neurrira egin ahal izango dituzu.

Gure webgunea ere eraberritu dugu urte berriarekin. Itxura aldatzearekin batera ikastaroen inguruko informazioa hobeto ematea da gure asmoa webgune berriarekin, beste hainbat hobekuntzarekin batera. Bertsio berrian nabarmendutako informazioak eta bideoak era ikusgarriagoan txertatu ditugu webgunean. Informazio finkoen egitura ere hobetu dugu, bakoitzaren azalpenak egokituz, ikastaroen gainekoa goikaldean nabarmenduz. Webgune eleanitza bihurtu dugu hizkuntza aukeratzeko aukerarekin. Webgunea zuen gustokoa izatea espero dugu eta ez ahaztu sare sozialetan ere bagaudela:Facebooken orrialdea daukagula, gure Twitter kontutik ohar laburrak ematen ditugula, Flickr-en euskaltegiaren hainbat argazki aurkituko dituzula eta Vimeon zein Youtuben hainbat bideo ditugula ikusgai.

Kafe Antzokiaren tailerrak urte berrian ere

komunikazioa — Sat, 24 Dec 2011 10:33:21 +0000

Aurreko hiruhilekoa arrakasta handiz burutu ostean, berriro dugu aukera Zenbat Garak Kafe Antzokian antolatzen dituen tailerretako batean izena emateko. Urtarrilaren 26an hasiko dira bigarren hiruhileko tailerrak. Hori bai, Gabriel Aresti euskaltegiko ikasleek doan daukate tailerretan parte hartzeko aukera. Izena emateko eta informazio gehiagorako, Zenbat Gara Elkartearen bulegora jo (Kafe Antzoki gainean, 4. solairuan) edo telefonoz 94 423 75 91 zenbakira deitu.

Hiru hilabeteko iraupena izaten dute tailer bakoitzak eta, bat bukatu ostean, beste bat aukera daiteke hurrengoan, dagoen aukera zabalaren artean. Ezaugarri desberdinetako tailerrak dira, ikuspegi kulturala lantzekoetatik hasi eta ludiko hutsetarainokoak. Besteak beste, kantagintza, euskal dantzak, haur kanta eta jolasak, bertsolaritza, euskararen soziolinguistika, irratia, bideogintza… eta beste asko, eskaeren arabera, sortuz joango direnak.

Tailerra, gure hizkuntzaren senetik ulertuta, elkarrekin zerbait egiten den jarduna da. Formakuntza zein ludikotasuna lantzeko bitarteko eta tresna; tailerra giza taldeak osatzen du gidari baten laguntzaz, eta bakoitzak dauzkagun gustuak lantzeko esparrua irekitzen digu. Gure Bilbo honetan milaka asko gara euskararen komunitatea osatzen dugunok eta gure aisialdia, lagun artekoa, prestakuntza, garapena, bizimodua azken finean, euskaraz egiten dugunok. Egoera horri erantzutera dator Kafe Antzokiak antolatutako tailerren ekimena.

Kontzertuak, prentsaurrekoak, kultur ekimenak, kantagintza, dantza ganbara, bertso ekitaldiak, bazkari-afariak, elkartasunezko jaiak… Eta horiez guztiez gain, Kafe Antzokiak orain tailerrak antolatu ditu bilbotar guztiontzat. Euskara ikasle, euskaldun zahar… etor zaitez lagun artera eta goza ezazu euskaraz, zeure gustuko jardunetan parte hartuz!

Kiribiltxoen zozketa gure Facebook orrialdean

Euskaltegia — Fri, 23 Dec 2011 10:04:01 +0000

Kiribiltxo artisautza webguneak gure Facebook orrialdeko lagunen artean zozketatzeko hiru opari hauek eman dizkigu. Zozketan sartzeko egin behar duzuen bakarra orrialdean Atsegin dut edo Me gusta egin eta kiribiltxoen argazki hau elkarbanatu “Partekatu” edo “Compartir” sakatuz. Hori egiten dutenen artean zozketatuko ditugu hiru bitxi hauek. Zozketa urtarrilaren 9an egingo dugu, euskaltegiko kurtso berriaren hasierarekin. Hiru irabazle egongo dira, batak brotxea, besteak belarritakoak eta hirugarrenak eraztuna eramango du. Zorte on! Irabazi ezik www.kiribiltxo.net webgunean honelako eta bestelako bitxi asko aurkituko dituzue.